ياريتها جت عالطماطم

Imageكنت لسة بتفرج على فيلم World War Z بطولة Brad Pitt وكان بيتكلم عن ال zombies وكده.. و ضمن احداث الفيلم إن إسرائيل هي أول دولة تاخد إحتياطاتها من الفيروس ده و تبني سور ضخم يحميها من هجمات ال zombies (محامهاش قوي عموما)

المهم .. لما Brad كان راح هناك عشان يقابل شخص عنده معلومات عن أصل الفيروس و جه منين و بتاع، و لما قابل الشخص ده سأله ليه إسرائيل كانت أول دولة تستعد للخطر ده، فـالراجل رد عليه بإن بعد احداث كتيرة حصلت لإسرائيل و مقدروش يتوقعوها (و اللي منها كانت حرب 1973) المخابرات قررت طريقة جديدة في بحث صحة أي معلومة تيجي لهم، و الطريقة دي اسمها “The 10th man rule” أو قاعدة الرجل العاشر. القاعدة ببساطة بتقول إن المجلس (المكون من 10 أشخاص) لما يبحث صحة معلومة ما و يبقى 9 من ال 10 أفراد متفقين على رأي، يبقى مهمة الشخص العاشر إنه يبحث في احتمالية حدوث الرأي الاخر حتى لو هو مش مقتنع بإمكانية حدوثه، و بكده يبقوا مستعدين لإحتمالية حدوث أي شيء.

القاعدة  دي أبهرتني بصراحة لدرجة إني بحثت عنها عالنت بعد ما خلصت الفيلم و لقيت واحد على Quora بيسأل إذا كانت اسرائيل بتستخدم القاعدة دي بجد ولا لأ. المفزع إن طلع الجيش الإسرائيلي بيطبق القاعدة  دي في الواقع فعلا في اتخاذ قرارته و كانت ضمن تغيرات كتير في استراتيجية اتخاذ القرار في الجيش الإسرائيلي بعد 1973. و مصدر المعلومة دي هو كتاب “Lessons from Israel’s intelligence reforms” و اللي ألفه “Yousef Kuperwasser” رئيس قسم البحث العلمي في وزارة الدفاع الاسرائيلية من 2001 إلى 2006.

آه صحيح.. اللي مستغرب من عنوان المقال، فيه إشاعة طالعة إن إسرائيل جايبة لينا طماطم مسرطنة.

ياريتها جت عالطماطم …